“ፀላእትና ክንከራታትሞም ኢና” “ህወሓትን እናስቀድም … ‘ጠላቶቻችንን እናውድም’!”

March 19, 2013 08:50 am By Editor 1 Comment

“ፀላእትና ክንከራታትሞም ኢና”

“ህወሓትን እናስቀድም … ‘ጠላቶቻችንን እናውድም’!”

ሦስት ቀናት የፈጀው የህወሓት ማእከላዊ ኮሚቴ አባላት ስብሰባ ትናንት ተጠናቋል። ለጉባኤው የሚሆን ኣጀንዳ ለመለየትና ልዩነታቸው ለማጥበብ ህወሓቶች ሲነታረኩ ቆይተው ቀጣዩ 11ኛ የህወሓት ድርጅታዊ ጉባኤ በሰላም ለማጠናቀቅ የተስማሙ ይመስላሉ ሲል ኢትዮ ሚዲያ መድረክ የመቀሌ ዘጋቢውን አብርሃም ደስታን ጠቅሶ ዘገበ።

የስብሰባው ተሳታፊዎች በሁለት ተከፍለው ዘለፋና የጠብ መንፈስ የተሞላበት ጭቅጭቅ ከተካሄደ በኋላ ሌላ ሦስተኛ ቡድን ተፈጥሮ “ህወሓትን እናስቀደም፣ ልዩነታችን ወደ ጎን ትተን የጋራ ጠላቶቻችንን እንታገል፣ ሁለታቹ (ቡድኖቹ) የህዝብ ድጋፍ የላችሁም፤ ስለዚህ በሁለት ከተከፈልን ህወሓት ህልውናው ያበቃል።” በሚል ተማጽኖ ማሰማታቸውን ድረገጹ አመልክቷል። በዶ/ር ቴድሮስ ኣድሓኖም የተመራ የሽምግልና ጥረት ታድያ ሁለቱም ቡድኖች ልዩነታቸው አጥብበው አብረው በጉባኤው እንዲሳተፉና በሰላም እንዲጠናቀቅ የበኩላቸው እንዲተባበሩ ስምምነት ላይ መደረሱንም አመልክቷል።

ልዩነታቸው የከረረ ጠብ እንደወለደና እስካሁን ‘የእግዚሄር ሰላምታ’ እንኳ እንደማይለዋወጡ የገለጸው ዘገባ ከልዩነታቸው መግዘፍ የተነሳ አንዳቸው ሌላኛው ቡድን ቢያሸንፍ እንኳ ለብቻው ህወሓትን ለማስቀጠል የሚያስችል የህዝብና ካድሬ ድጋፍ ሊኖራቸው እንደማይችል ገልጿል። የሚቀጥለው የህወሓት 11ኛ ድርጅታዊ (ዉድባዊ) ጉባኤ “ጉባኤ መለስ” (የመለስ ጉባኤ) ተብሎ ተሰይሟል። መለስ የሁለቱም (የሁሉም) ቡድኖች የጋራ ነጥብ መሆናቸውም ተጠቁሟል። ከጉባኤው በኋላ “ጠላቶች” ያሉዋቸውን አካላት እንደሚመቱ (እንደሚጨፈልቁ) ዝተዋል። ‘ፀላእትና ክንከራታትሞም ኢና!’ የሚል መግለጫ አውጥተዋል፡፡